Од март евтини летови Скопје-Брисел и Охрид-Амстердам
За два месеци од скопскиот и од охридскиот аеродром ќе летаат нови нискобуџетни авиокомпании кон Брисел и кон Амстердам. Холандската Туи ерлајнс и белгиската Џет ерфлај ќе почнат да оперираат кон средина на март, кога стартува и новиот летен распоред на авиолинии. Од Агенцијата за цивилно воздухопловство сметаат дека со владините субвенции, кои изнесуваат околу пет милиони евра за следните три години, ќе привлечат нови компании, но и дека кризата ќе доведе до повлекување на неколку други авиопревозници. Пред неколку денови, унгарската авиокомпанија Малев објави банкрот поради сериозни финансиски долгови и ги приземји авионите во сите земји во светот. Чех ерлајнс, пак, ќе престане да лета од Скопје од 1 март.