Зошто Ставрески не ја внесе Македонија во Јужен поток?!

Катерина Попоска

Експертите јавно прашуваат дали влезот на Македонија во Јужен поток е само македонска желба или навистина е можно. Ја спорат проактивноста на Владата за Македонија да стане дел од меѓународниот коридор

Експертите остро реагираа на владината неактивност и неажурност поради што Македонија останува заобиколена од главните гасоводни траси на меѓународниот коридор Јужен поток, кој според последните најави треба да почне да се гради во декември годинава. Последните официјални информации од Газпром, објавени на нивната официјална интернет-страница кон крајот на декември, покажуваат дека Македонија ниту ќе биде транзит за руско-италијанскиот мегапроект, ниту пак е договорено крак од Јужен поток да се гради во земјава.

Експертите ја спорат ажурноста на македонскиот преговарачки тим со Газпром, предводена од министерот за финансии, Зоран Ставрески, поради фактот што на официјалната мапа каде што ќе минува Јужен поток е предвидена изградба на можен крак од Србија кон Хрватска. Можен крак кон Македонија засега не е исцртан ниту од Бугарија, ниту од Србија, ниту од Грција...