(01.02) Русија влегува во СТО – што добива, а што губи Македонија?

Биљана Здравковска-Стојчевска

По 18 години преговарање, Русија конечно стана членка на СТО, односно конечно прифати да го намали мешањето на државата во бизнисот и да го отвори домашниот пазар за странски компании преку намалување на царините и остранување на разните нетарифни бариери. Но, членството во Русија исто така ја отвора вратата и за полесно тргување со земја која е меѓу најголемите производители и извозници на нафта, природен гас и метали. “Капитал“ анализира кои македонски индустрии може најмногу да добијат или да изгубат од членството на Русија во СТО

----------------------------------------------------------------------------------------------------------
30% во просек ќе се намалат царините за увоз во Русија
18 години траеја преговорите на Русија за влез во СТО
141 милион жители има Русија
----------------------------------------------------------------------------------------------------------

Во декември минатата година, по 18 години преговарање, Русија конечно стана членка на СТО (Светската трговска организација). Русија треба до 15 јуни да го ратификува протоколот за членство, а потоа да почне и со постепено спроведување во практика на тоа што го договори со СТО.

Протоколот ги содржи обврските на Руската Федерација за прилагодување на трговската политика со таа на СТО, која важи за 157 земји од светот. Главната придобивка е во постепеното намалување на царинските стапки. Новите царински стапки на Русија, како за Македонија, така и за останатите земји-членки на СТО значат поевтинување и можност за зголемување на извозот. Колку ќе се искористи оваа можност зависи од капацитетите и од конкурентноста на секоја економија...