Цената на пченицата расте на светскиот пазар

Цените на пченицата на берзата во Париз по завршувањето на вчерашното рабоење се зголемија трет пат по ред под влијание на стравувањата дека неповолните временски прилики во Украина ќе резултираат со низок род и ќе го принудат Киев да го намали извозот.

Пченицата за испорака во мај на 20 февруари поскапе за 0,8 % на 211,5 евра за тон.Во електронското тргување денеска цените се стабилизираа на вчера оствареното ниво. Украинските весници објавуваат дека Владата им препорачала на трговците со жито да го ограничат извозот на пченица во тековната земјоделска сезона, која завршува на 30 јуни.

Препораките повторно ќе се разгледаат кон средината на април, кога ќе биде појасна ситуацијата со родот на пченицата. Американското Министерство за земјоделство минатата недела ја намали прогнозата за извоз на пченица од Украина во 2011-2012 земјоделска година на шест милиони тони од претходно очекуваните седум милиони.