Меркел во Индија договара реформи на ОН

Германската канцеларка Ангела Меркел и индискиот премиер Манмохан Синг вчера разговараа за желбата на нивните две земји за реформи во Советот за безбедност на Обединетите нации (ОН). Моментно и двете земји се непостојани земји- членки на Советот за безбедност на ОН со двегодишен мандат.

Меркел побара структурни реформи, бидејќи, како што рече, Советот за безбедност веќе не ја одразува позицијата на силите во светот, како што беше по Втората светска војна, на што Синг дополни дека Светот од 1945 година веќе не постои.

Германија и Индија заедно со Бразил и Јапонија ја формираат Г-4 групата која се залага за реформи во Советот за безбедност на ОН, што “ќе ја отсликуваат новата глобална структура“. Тие во повеќе наврати ја искажаа амбицијата да добијат постојано место во Советот за безбедност. Сега постојани членки на Советот за безбедност на ОН се Велика Британија, Кина, Русија, САД и Франција.