ЕУ ќе обезбеди 82 милиони евра помош за Албанија

Европската унија објави дека ќе обезбеди 82 милиони евра помош за Албанија во следните две години за спроведување на инфраструктурни проекти и реформи. Во денешното соопштение на претставниците на ЕУ во Тирана се наведува дека средствата се наменети за финансирање патни проекти, станици за прочистување, како и дека ќе бидат насочени за засилување на конкурентноста на земјоделството, социјално вклучување на ромското население во земјата, за правосудството и образованието.

Албанија поднесе барање за членство во ЕУ во 2009-та година, но од неа беше побарано најпрво да спроведе реформи за подобрување на изборниот процес и јавната администрација, борбата против корупцијата и организираниот криминал. Од 1991 година досега Албанија од ЕУ има добиено 1,83 милијарди долари.