Хрватска денеска официјално ги завршува преговорите за членство во ЕУ

Хрватска денеска попладне ќе ги затвори последните четири поглавја и на тој начин официјално ќе ги заврши преговорите за членство во ЕУ, објави хрватската телевизија.Тоа ќе се случи на меѓувладина конференција за присоединување, која ќе се одржи на ниво на министри, неколку часа пред крајот на унгарското претседавање со ЕУ.

Хрватската делегација ќе биде предводена од вицепремиерот и министер за надворешни работи и евроинтеграции Гордан Јандроковиќ, а делегацијата на ЕУ од шефот на унгарската дипломатија Јанош Мартони.На средбата во Брисел минатата недела државните и владини лидери од ЕУ повикаа за завршување на преговорите до крајот на овој месец за членство на Хрватска во Унијата и побараа Европскиот совет да ги преземе сите потребни решенија за затворање на останатите поглавја до крајот на јуни и за потпишување на Договорот за присоединување до крајот на оваа година.

Процесот на одобрување на членството на Хрватска се очекува да трае околу 18 месеци. Земјите членки ќе треба да го одобрат Договорот за присоединување, откако тој ќе биде потпишан. Договорот ќе треба да добие зелено светло и од Европскиот парламент, како и од хрватските граѓани кои треба да се изјаснат на референдум.