Грција ќе гради автопатишта за 8,7 милијарди евра

Владата на владејачката партија во Грција, ПАСОК, најави пет концесии за поправка и изградба на патишта. Вкупната цена на проектот изнесува 8,7 милијарди евра и ќе се имплементира врз основа на јавно-приватните партнерства.

“Се работи за изградба на нови делници со должина од 720 километри и обновување на дополнителни 530 километри од постоечките автопатишта“, изјави министерот за транспорт и инфраструктура, Димитрис Репас, претставувајќи го проектот. На овој проект зелено светло му даде и министерот за финансии, Јоргос Папаконстинтиноу.

Во концесиите ќе бидат вклучени државата, шест грчки и шест странски инвеститори и 43 банки. Проектот ќе го изведуваат шест грчки градежни компании и четири странски фирми. Од финансиските институции што ќе бидат вклучени, 11 се локални, а 32 странски. Државата ќе учествува со 26,5% од вредноста на проектите, што е 2,3 милијарди евра, а 26,5% ќе се обезбедат од приходите од патарините што ќе се собираат само за финансирање на проектот во подоцнежната фаза.