Еврозоната ќе го зголемува фондот за финансиска стабилност

Земјите од еврозоната се подготвени да го зајакнат фондот за спасување на економиите на своите членки, кој моментално располага со 440 милијарди евра, стравувајќи од опасноста грчката криза да се прошири во Италија или Шпанија, изјави синоќа шефот на Еврогрупата Жан-Клод Јункер.

Во изјавата дадена по состанокот со министрите за финансии од 17-те земји членки на еврозоната, Јункер истакна дека е постигната согласност за мерките кои вклучуваат “јакнење на флексибилноста и обемот на Европскиот фонд за финансиска стабилност“.

Тој додаде дека конкретни предлози со примена на мерки ќе бидат наскоро претставени.Во соопштението објавено по осумчасовниот состанок е поздравена одлуката на ММФ за неодамнешната исплата на новата транша финансиска помош за Грција, како и предлозите од приватниот сектор за придонес во финансирањето на втората програма помош, на што веќе се работи.

Министрите заклучија дека одговорноста за решавање на кризата е на Грција, но ја признаа потребата за поширок пристап и економска политика свртена кон иднината, со цел да им се помогне на владите во нивните напори да се изборат со должничката криза и да ја зачуваат финансиската стабилност во еврозоната, се наведува во соопштението на Еврогрупата.