КХВ ги вади "валканите алишта" на Вардар осигурување на површина

Зголемувањето на капиталот на Вардар осигурување поради усогласување со Законот за супервизија на осигурувањето, повторно предизвикува скандали. Дури и по конечното завршување на процесот на докапитализација, Комисијата за хартии од вредност повторно објави неправилности во работењето на ова друштво. Од Комисијата објавија дека јавно ќе ги обелоденат незаконитостите кои ги има направено Вардар осигурување во постапката за издавање на втора емисија на долгорочни хартии од вредност.   

Според наодите на КХВ, друштвото врз основа на неконечно решение ја евидентирало втората емисија на акции, прво во Централниот регистар, а потоа и во Централниот депозитар за хартии од вредност. Со тоа ги повредило одредбите на Законот за хартии од вредност, според кои хартиите од вредност се уплатуваат во рок од 15 календарски дена од конечноста на решението.

Од КХВ информираат дека поради предвремено евидентирање на емисијата, го санкционирале и Централниот депозитар за хартии од вредност, со мерката-јавно објавување на утврдената неправилност во работењето на ЦДХВ.

Инаку, Вардар осигурување го проби законскиот рок за зголемување на основниот капитал на друштвото и доцнеше со процесот на докапитализација (кој требаше да заврши до почетокот на 2009 година) половина година. Во јуни годинава конечно ја заврши целата постапка и го зголеми основниот капитал од 750.000 евра на три милиони евра, колку што е законскиот цензус согласно Законот за супервизија на осигурувањето, а е потребен за вршење на сите класи на неживотно осигурување. Како резултат на внатрекомпаниските проблеми и нивната рефлексија врз работењето на компанијата, Министерството за финансии не му ја обнови лиценцата на генералниот директор Стојан Клопчевски. Сега Вардар осигурување има нов генерален директор, тоа е Трајче Латиновски. 

Измените во Законот за супервизија на осигурувањето беа донесени во 2007 година. Како што лани тврдеа неофицијални извори од Вардар, проблемот во докапитализацијата на друштвото се јавил во постапката на издавање нови хартии од вредност, која се спроведува согласно Законот за хартии од вредност, кој во јули 2008 година исто така претрпе промени. Тие промени кои налагаат новите емисии-акции на друштвата издадени по пат на приватна понуда да се вршат по последната пазарна цена на акциите, а не по нивната номинална вредност, всушност создадоа проблем, затоа што во тој момент последната пазарна цена на акцијата на Вардар беше 2.500 евра. Толку колку што чинеа акциите на Вардар непосредно пред неговата продажба.