Се трудиме да бидеме што е можно повеќе проактивни и да изградиме малку поинаква структура на акционери, бидејќи според едно истражување кое го изработивме, дојдовме до заклучок дека во банката имаме повеќе краткорочни од долгорочни инвеститори, од западните земји. Затоа ќе се обидеме да ја промениме нивната структура, а тоа бара дополнителна работа. Ќе мораме да правиме повеќе роуд шоуа и да бараме инвеститори кои за нас ќе бидат интересни. Значи ние ќе ги избираме инвеститорите, а не како досега во банката да влегуваат само инвеститорите кои нас не избираат. Нашата банка е и најлош и најдобар пример во односите со инвеститорите. Во 2004 година бевме рангирани како банка која има најлош однос со своите инвеститори во Полска. После објавувањето на рангирањето, сериозно се зафативме за работа и сега сме меѓу банките кои негуваат најдобри односи со инвеститорите, а наша цел е во иднина ние да ги диктираме промените во Полска во однос на ова прашање. Значи тогаш направивме значителни промени во менаџментот, политиката ја променивме во целост и станавме отворени со инвеститорите. Денес многу полесно можеме да им ја соопштиме лошата вест, наместо да ги лажеме и да ги тапкаме по рамо. Најважно е кон инвеститорот да се однесуваме со доверба, бидејќи само на тој начин можете да ја стекнете и довербата од негова страна. Во изминатиот период интензивно се посветивме кон домашните инвеститори и самите посегнавме кон нив, наместо да ги чекаме тие да се заинтересираат за нас. Потоа решивме двапати годишно на полугодието и на крајот на годината да организираме состаноци со секој инвеститор и фонд-менаџер одделно, бидејќи сфативме дека тие се премногу зафатени да ги читаат нашите податоци на веб страната.

Извештаите законски мораме да ги објавуваме секој квартал, иако оваа година поради меѓународните закони за односи со инвеститори, почнавме да го објавуваме само шестмесечниот извештај, без притоа да ги објавуваме и резултатите од вториот квартал. Разликата во односите со инвеститори кај банките е тоа што прашањата од страна на инвеститорите се многу различни од една обична компанија, бидејќи работите кои се важни за една банка како што е управувањето со ризикот, можат да бидат маргинални во некоја друга компанија, која на пример произведува чевли. Значи прашањата на инвеститорите со сигурност се разликуваат, но тоа што е одредено законски, тоа секоја компанија има обврска да го каже.

Секоја компанија треба да биде свесна дека односите со инвеститорите се многу важен елемент и тие треба да се третираат на доследен начин. Не треба да ги лажеме и да им даваме погрешни податоци. Многу често се случува компаниите наместо сериозно и искрено да разговараат со инвеститорите за тоа какви им се проблемите и да ги даваат вистинските финансиски резултати, да прават политички митинг и да даваат ветувања дека ќе биде подобро, а следниот ден на пример да објавува огромна загуба. Тоа нема да помогне во никој случај, без разлика на кој начин ја водите компанијата. На инвеститорите не им се потребни компании со лажно изграден добар ПР, туку тие сакаат да ги слушнат фактите. Многу е важно на инвеститорите да им се дадат вистинските информации, а не податоците објавени во кварталниот извештај.